Ni ibintu nari maze igihe nitegura- Umunyarwenya Rufendeke winjiye mu gukora filime ze bwite

Rufendeke agaragara cyane muri iki gihe muri filime z’abarimo umukinnyi wa filime Nyaxo, ndetse ni umwe mu babarizwa mu inzu ifasha abahanzi mu bya muzika ya ‘Giti Business Group’ yashinzwe na Bugingo Bonny wamamaye nka Junior Giti. 

Uyu musore yamenyekanye cyane binyuze mu gutumirwa mu bitaramo by’urwenya cya Comedy Knights, Gen-Z Comedy n’ibindi. 

Mu kiganiro na InyaRwanda, uyu musore yavuze ko tariki 30 Mutarama 2025, azashyira hanze filime ye bwite, ariko ntibivuze ko azahagarika gukina no muri filime z’abandi.

Ati “Nahisemo kwikorera, ariko nkajya ngaragara no muri filime z’abandi, ari nako nkora no muri filime yanjye. Ubu, natangiriye kuri filime zirangira, ariko vuba aha ndasohora filime y’uruhererekane (Series) niteze ko abantu bazakunda.”

Akomeza ati “Impamvu nabonye ko ari ngombwa. Niba ndi umukinnyi wa filime, ndi umunyempano muri rusange mba ngomba byose kubigerageza. Ubundi buriya biba byiza iyo ufite ‘Project’ yawe, kuko ugaragara muri filime z’abandi, kandi nabo bashobora kuza ku gufasha muri filime ya bwite.”

Rufendeke yasobanuye ko kuba agiye gutangira gukora filime ye bwite, bitavuze ko yabonye amafaranga menshi ahubwo “Nashakaga kwikorera.'

Ati “Ntabwo navuga ko ari amafaranga abonetse adasanzwe, kuko buriya amafaranga ni nk’amaraso ntufite macye baramwongerera, ahubwo navuga ko byaturutse mu gushaka gukora ibintu byanjye.”

Yavuze ko atangiye uyu mushinga ashyigikiwe na Label abarizwamo ndetse na Smart House isanzwe imutera inkunga. Ariko kandi avuga ko ishoramari rye ryanashingiye ku mafaranga yagiye akuramo mu rwenya mu bihe bitandukanye. Ati “Nkora ‘Stand up Comedy’ kandi hari amafaranga bagiye bampa, rero ayo yose n’andi niyo nashingiyeho hanyuma nifashisha n’abandi’.”

Uyu munyarwenya yavuze ko ibice bya mbere bya filime bye bizibanda cyane ku mibereho y’abantu umunsi ku munsi n’ibindi biteye amatsiko abantu bibaza. Ati “Nzagaruka ku bujura, ivugabutumwa, mbese imibereho ya buri munsi abantu banyuramo, ni nk’uko nsanzwe mbikora muri ‘Comedy’ ntekereza ko ntazajya kure y’ibi.”

Yavuze ko filime ngufi zizaba zifite ingingo zibandaho, ariko muri filime z’uruhererekane azita cyane ku ngingo ikunze kugarukwaho mu buzima. Mu ntangiriro y’uyu mushinga wa filime ze, Rufendeke yatangiye n’umukobwa witwa Nicky wagaragaye mu mashusho y’indirimbo ‘Warumagaye’ ya Victor Rukotana.

Rufendeke ni umunyarwenya w'umunyarwanda ukorera mu mujyi wa Kigali. Yamenyekanye cyane mu bitaramo by'urwenya nka 'Gen-Z Comedy Show', aho asusurutsa abantu mu buryo bwihariye.

Afatanya n'abandi banyarwenya nka Keffa, bakora urwenya rutandukanye, harimo no gusubiramo indirimbo z'abahanzi baziririmba mu buryo bushya busetsa.

Mu bitaramo bye, Rufendeke akunze kugaragaza imyitwarire idasanzwe, nko kwiyakira ku rubyiniro, gusubiramo ibyo yavuze, ndetse no gukoresha ururimi rw'igifaransa mu buryo busetsa. Ibi bituma yigarurira imbaga y'abafana bamukunda kubera ubuhanga bwe mu gusetsa.

Rufendeke kandi yitabira ibitaramo bitandukanye by'urwenya mu karere. Nko mu 2024, yagiye mu Burundi mu gitaramo cyateguwe na Zuby Comedy, ari kumwe na Mitsutsu na Nyaxo.

Uretse ibyo, Rufendeke ni umwe mu banyarwenya bakunzwe mu Rwanda, aho yitabira ibitaramo bitandukanye by'urwenya, agasetsa abantu mu buryo bwihariye.

Kubera ubuhanga bwe mu gusetsa, Rufendeke akomeje kwagura umwuga we, yitabira ibitaramo bitandukanye mu Rwanda no mu karere, kandi akomeje kwigarurira imitima y'abakunzi b'urwenya.

Umunyarwenya Rufendeke yatangaje ko agiye gutangira gushyira ku isoko filime ze bwite 

Rufendeke yavuze ko gukora filime ze bwite, byaturutse ku bushobozi yishatsemo 

Rufendeke yasobanuye ko bagenzi be bahurira muri filime zitandukanye, ari bamwe mu bo azifashisha muri izi filime ze bwite 

Rufendeke amaze igihe agaragara muri filime z’urwenya za Nyaxo 

Rufendeke ari kumwe n'umukobwa witwa Nicky yatangiye kwifashisha muri filime ze bwite 

KANDA HANO UBASHE KUREBA INTEGUZA YA FILIME ZA RUFENDEKE

">